ভাৰতৰ গৰ্ভৱতী মহিলা সকলেও ল'ব পাৰিব ক'ভিড ১৯ৰ ভেকচিন - Pregnant women in India now eligible for vaccination
ভাৰত চৰকাৰৰ স্বাস্থ্য মন্ত্ৰণালয়ৰ দ্বাৰা জাননী জাৰী কৰা হৈছে যে বৰ্তমানেও ভেকচিন নোলোৱা ভাৰতৰ গৰ্ভৱতী মহিলা সকলে এতিয়া ল'ব পাৰিব ক'ভিড ভেকচিন । মহিলা সকলৰ স্বাস্থ্য আৰু সুৰক্ষাৰ প্ৰতি লক্ষ্য ৰাখি এই সিদ্ধান্ত গ্ৰহণ কৰা হৈছে ।
গোটেই বিশ্বতে কালৰূপ ধাৰণ কৰা কৰোণা ভাইৰাছৰ পৰা নিজকে সুৰক্ষিত কৰি ৰাখিবলৈ প্ৰত্যেকেই টীকা কৰণ কৰাতো বাঞ্চনীয় । এই ক্ষেত্ৰত গৰ্ভাৱতী মহিলা সকল অধিক সচেতন হোৱা উচিত । চৰকাৰে সকলোৰে বাবে ভেকচিন লোৱাৰ ব্যৱস্থা কৰিছিল যদিও এনে মহিলা সকলৰ বাবে চিন্তাৰ বিষয় হৈ পৰিছিল । ইয়াৰ বাবে মহিলা সকলে Cowin appত registration কৰিব পাৰে অথবা ওচৰৰ টীকা কৰণ কেন্দ্ৰত যোগাযোগ কৰিব পাৰে । এই ব্যৱস্থা সমগ্ৰ দেশতে প্ৰযোজ্য কৰাৰ জাননী জাৰী কৰা হৈছে । গৰ্ভৱতী অৱস্থাত মহিলা সকল কভিড ১৯ ত আক্ৰান্ত হ'লে বিভিন্ন সমস্যাৰ সন্মুখীন হয় । সঘনাই শৰীৰ দুৰ্বল হোৱা, উশাহ-নিশাহত কষ্ট পোৱা আদিৰ দৰে সমস্যাই দেখা দিয়ে । এই সমস্যাই কালক্ৰমত শিশুৰ জন্মৰ সময়ত অসুবিধাৰ সৃষ্টি কৰিব পাৰে । গৱেষক সকলে মত পোষণ কৰে যে সাধাৰণ মহিলাতকৈ ক'ভিড ভাইৰাছে গৰ্ভৱতী মহিলাক অধিক ক্ষতি কৰিব পাৰে ।
সকলো ঔষধৰে কিছুমান বেয়া প্ৰভাৱ অৰ্থাৎ side effects থাকে । ক'ভিড ১৯ ভেকচিনৰ ক্ষেত্ৰতো ইয়াৰ ব্যতিক্ৰম ঘটা নাই যদিও ইয়াৰ প্ৰভাৱ প্ৰায় নূন্যতম । ভেকচিন গ্ৰহণ কৰাৰ পাছত সামান্য জ্বৰ , গাৰ বিষ, বেজি লোৱা জেগা দুখৰত সামান্য বিষ হোৱাতো স্বাভাৱিক । এই অসুবিধা সমূহ ভেকচিন লোৱাৰ ২০ দিনৰ ভিতৰত বাঢ়ি যোৱা দেখা গ'লে ডাক্তৰৰ পৰামৰ্শ ল'ব লাগে ।
ইয়াৰ উপৰিও স্বাস্থ্য মন্ত্ৰণালয়ে কিছুমান বিশেষ সমস্যাৰ উল্লেখ কৰিছে যিবোৰ লক্ষণে দেখা দিলে ডাক্তৰৰ পৰামৰ্শ লোৱাতো প্ৰয়োজনীয় । ইয়াৰে উশাহ-নিশাহত কষ্ট পোৱা , বুকুত বিষ অনুভৱ কৰা , বমি বমি ভাৱ হোৱা , পেটৰ বিষ অনুভৱ কৰা , অস্পষ্ট দৃষ্টি আৰু চকুত বিষ অনুভৱ কৰা অন্যতম চিন্তাৰ কাৰণ হ'ব পাৰে । যদি কোনো মহিলাৰ এলাৰ্জিৰ সমস্যা থাকে অথবা খোৱা বস্তুৰ পৰা আৰু অন্যান্য বেজিৰ পৰা এলাৰ্জি হোৱাৰ সম্ভাৱনা থাকে তেওঁলোকে ডাক্তৰৰ পৰামৰ্শ লোৱা উচিত ।
আৰু যিসকল মহিলা ইতিমধ্যে কৰোণা ভাইৰাছত আক্ৰান্ত হৈছে তেওঁ লোকে ভেকচিন লোৱাৰ পৰা বিৰত থাকক । ইয়াৰ উপৰিও যিসকল মহিলা ডায়বেটিছ , বহু পুৰণি উশাহ-নিশাহৰ সমস্যা , হৃদৰোগৰ সমস্যাত ভুগি আছে তেওঁ লোকে ডাক্তৰৰ পৰামৰ্শমতে ভেকচিন ল'ব লাগে ।।
By Barsha Borah
