বিশ্বৰ প্ৰথমখন বৈদ্যুতিক যাত্ৰীবাহী বিমান আকাশলৈ উঠিল
গতানুগতিক ইন্ধনৰ পৰিৱৰ্তে আমেৰিকাৰ আকাশত উৰিছিল সম্পূৰ্ণ বৈদ্যুতিক যাত্ৰীবাহী বিমান। এলিছ নামৰ এই বিমানখনে যোৱা মঙলবাৰে পুৱা স্থানীয় সময় অনুসৰি ৱাশ্বিংটনৰ গ্ৰাণ্ট কাউন্টি আন্তঃৰাষ্ট্ৰীয় বিমানবন্দৰৰ পৰা ৮ মিনিটৰ চুটি বিমান যাত্ৰা কৰিছিল। অৱশ্যে উদ্বোধনী বিমানখনত কোনো যাত্ৰী নাছিল।
ইজৰাইলৰ এভিয়েশ্যন এয়াৰক্ৰাফ্ট নামৰ এয়াৰলাইন্সে নিৰ্মাণ কৰিছে এই বিমানখন। প্ৰথম উৰণত ই সাগৰ পৃষ্ঠৰ পৰা ৩৫০০ ফুট ওপৰলৈ উঠিছিল।
কোম্পানীটোৰ সভাপতি তথা মুখ্য কাৰ্যবাহী বিষয়া গ্ৰেগৰী ডেভিছে এই বিমানখনক “ঐতিহাসিক” বুলি অভিহিত কৰিছে। তেওঁ আমেৰিকাৰ মিডিয়া চিএনএনক জনোৱা মতে, পঞ্চাশৰ দশকৰ পিছত এই নতুন প্ৰযুক্তিৰ ব্যৱহাৰ এই বিমানত প্ৰথমবাৰৰ বাবে কৰা হৈছে।
এভিয়েশ্যন এয়াৰক্ৰাফ্টে কয় যে এই বিমানখন মাত্ৰ আধা ঘণ্টাত চাৰ্জ কৰিব পাৰি, ঠিক ইলেক্ট্ৰিক গাড়ী বা মোবাইল ফোনৰ দৰেই। ই ৯ জন যাত্ৰীৰ সৈতে এক ঘণ্টা আকাশত উৰিব পাৰে। গতি, প্ৰতি ঘণ্টাত প্ৰায় ৪৪০ নটিকেল মাইল। এলিছে সৰ্বোচ্চ ২৫০ নট বা ২৮৭ মাইল প্ৰতি ঘণ্টাত যাত্ৰা কৰিব পাৰে।
মঙলবাৰে প্ৰথম বিমানৰ পিছত এই তথ্য সংগ্ৰহ কৰি পৰ্যালোচনা কৰিব এভিয়েশ্যনে। মাত্ৰ কেইবছৰমানৰ ভিতৰতে ইয়াক যাত্ৰী পৰিবহণ কৰিব পৰাকৈ সক্ষম কৰাৰ আশা কৰিছে কোম্পানীটোৱে। বিমান সংস্থাই বিশ্বাস কৰে যে যদি সকলো পৰিকল্পনা অনুসৰি হয় তেন্তে ২০২৭ চনৰ ভিতৰত বিমানখনে যাত্ৰীৰ সৈতে যাত্ৰা কৰিব পাৰিব।
বিমান সংস্থাটোৱে জনোৱা মতে, এলিছৰ তিনিটা সংস্কৰণ — যাত্ৰী, বিলাসী আৰু মালবাহী — বৰ্তমান পৰীক্ষা চলি আছে। এই যাত্ৰীবাহী বিমানখনত ৯ জন যাত্ৰী আৰু দুজন পাইলট থাকিব পাৰিব। এই বিলাসী বিমানখনত ৬ জন যাত্ৰী কঢ়িয়াব পাৰিব। আনহাতে, কাৰ্গো এলিছত ৪৫০ ঘনফুট কাৰ্গো স্থান আছে।
