উৎকোচ গোচৰত গ্ৰেপ্তাৰ হোৱা বিজেপি বিধায়কৰ পুত্ৰক ২০১৭ চনত ৫৫ কোটি টকাৰ আৰ্থিক অনিয়মৰ বাবে নিলম্বন কৰা হৈছিল
চলিত মাহৰ আৰম্ভণিতে উৎকোচ গোচৰত গ্ৰেপ্তাৰ হোৱাৰ পূৰ্বে প্ৰশান্ত মদালক—বিজেপি বিধায়ক মদল বিৰুপক্ষপ্পাৰ পুত্ৰ তথা বাংগালুৰু জল যোগান আৰু নলা ব’ৰ্ডৰ মুখ্য একাউণ্ট বিষয়া—ক ২০১৭ চনত চৰকাৰী সংস্থাৰ কোটি কোটি টকা ডাইভাৰ্ট কৰাৰ অভিযোগত নিলম্বন কৰা হৈছিল।
কৰ্ণাটক ছ’পছ এণ্ড ডিটাৰজেণ্টছ লিমিটেড (কে এছ ডি এল)ৰ অধ্যক্ষ হিচাপে কৰ্মৰত পিতৃৰ হৈ ৪০ লাখ টকাৰ উৎকোচ গ্ৰহণ কৰাৰ অভিযোগত ২ মাৰ্চত প্ৰশান্তক গ্ৰেপ্তাৰ কৰা হৈছিল। প্ৰশান্ত আৰু বিৰুপাক্ষ্প্পাৰ বাসগৃহতো বিষয়াসকলে অভিযান চলাই নগদ ধন উদ্ধাৰ কৰে। এই অভিযানৰ পিছতে বিৰুপাক্ষপ্পাই কে এছ ডি এলৰ অধ্যক্ষ পদৰ পৰা পদত্যাগ কৰে। তেওঁ এতিয়াও গ্ৰেপ্তাৰ হোৱা নাই আৰু লোকায়ুক্ত আৰক্ষীয়ে তেওঁৰ বিৰুদ্ধে লুকাউট নোটিচ জাৰি কৰিছে।
২০১৭ চনৰ গোচৰটোত প্ৰশান্ত কৰ্ণাটক গ্ৰাম্য আন্তঃগাঁথনি উন্নয়ন লিমিটেডৰ ডেপুটি একাউণ্ট অফিচাৰ হিচাপে কাৰ্যনিৰ্বাহ কৰি থকাৰ সময়তে বেংকত জমা কৰা কে আৰ আই ডি এলৰ ৫৫ কোটি টকা নিৰুদ্দেশ হোৱাৰ পিছত তেওঁক নিলম্বিত কৰা হৈছিল। প্ৰশান্তৰ লগতে তেতিয়াৰ কে আৰ আই ডি এলৰ মুখ্য বিত্ত বিষয়া বীৰনাগৌদা পাটিল আৰু তেতিয়াৰ বিত্ত অধীক্ষক শংকৰাচাৰীকো তদন্তৰ অপেক্ষাত নিলম্বন কৰা হয়।
তদুপৰি মংগালুৰুৰ বেংক শাখা নিৰ্বাচনৰ সময়ত নীতি-নিয়ম উলংঘা হোৱা বুলিও বিষয়াসকলে কয়। য’ত জমা হ’ব সেই বেংকসমূহ চূড়ান্ত কৰাৰ দায়িত্ব প্ৰশান্তৰ আছিল বুলিও তেওঁলোকে লগতে কয়।
২০১৭ চনৰ অক্টোবৰ মাহত সুৰাথকাল আৰক্ষী থানাত দাখিল কৰা এফআইআৰ অনুসৰি ২৩ আগষ্টত ইণ্ডিয়ান অভাৰচিজ বেংকৰ কুলাই শাখাত ২০ কোটি আৰু এসপ্তাহৰ পিছত ৩৫ কোটি টকা জমা হৈছিল। ‘টকা ট্ৰেন্সফাৰ হোৱাৰ লগে লগে জড়িতসকলে এটা কাৰেণ্ট একাউণ্ট খুলিলে। এটা ভুৱা জমা প্ৰমাণ পত্ৰ চৰকাৰলৈ প্ৰেৰণ কৰা হয় আৰু কেইদিনমানৰ ভিতৰতে গোটেই টকাখিনি নোহোৱা হৈ যায়।’-এজন জ্যেষ্ঠ বিষয়াই এইদৰে কয়।
২০১৭ চনত এই গোচৰটো তদন্তৰ বাবে চি আই ডিলৈ হস্তান্তৰ কৰা হৈছিল।চি আই ডিৰ তদন্তৰ উপৰিও কে আৰ আই ডি এলৰ বিষয়াসকলৰ বিৰুদ্ধে বিভাগীয় তদন্তও আৰম্ভ কৰা হৈছিল। সূত্ৰই জনোৱা মতে, কে আৰ আই ডি এলৰ অভিভাৱক বিভাগৰ গ্ৰামোন্নয়ন আৰু পঞ্চায়ত ৰাজ বিভাগেও এই গোচৰৰ তদন্ত কৰে।
প্ৰায় এবছৰ পূৰ্বে চৰকাৰক এখন ফাইল দাখিল কৰা হৈছিল, য’ত এই গোচৰৰ সৈতে জড়িত অভিযোগনামাত প্ৰশান্তৰ নাম অন্তৰ্ভুক্ত কৰা হৈছিল। ‘প্ৰশান্তক গোচৰৰ সন্দৰ্ভত নিলম্বন কৰা হৈছিল আৰু তাৰ পিছত তেওঁক পুনৰ নিযুক্তি দিয়া হৈছিল। প্ৰায় এবছৰ পূৰ্বে যেতিয়া প্ৰশান্তক চাৰ্জশ্বীটত অন্তৰ্ভুক্ত কৰাৰ অনুমতি বিচাৰি চৰকাৰক ফাইল দাখিল কৰা হৈছিল, তেতিয়া শেষ পৰ্যায়ত তেওঁৰ নাম তালিকাৰ পৰা বাদ দিয়া হৈছিল।’-এইদৰে কয় এজন শীৰ্ষ বিষয়াই দ্য ইণ্ডিয়ান এক্সপ্ৰেছক।
চৰকাৰী বিষয়াৰ বিৰুদ্ধে গোচৰ চলোৱাৰ বাবে নিষেধাজ্ঞাৰ অনুমোদন জনাইছে কৰ্মচাৰী আৰু প্ৰশাসনিক সংস্কাৰ বিভাগে। কৰ্ণাটকত ডিপিআৰ মুখ্যমন্ত্ৰীয়ে চম্ভালে।
কিন্তু বিত্ত মন্ত্ৰালয় আৰু বেংকৰ শীৰ্ষ বিষয়াসকলৰ ওচৰত অভিযোগৰ ভিত্তিত চৰকাৰে এই ধন আদায় কৰিবলৈ সক্ষম হয়।
